د هلمند پوهنتون علمي شورا غونډه
د هلمند پوهنتون علمي شورا غونډه نېټه: ۱۶/۶/۱۴۰۲ ورځ: پنج شنبه د هلمند پوهنتون د رئیس په مشرۍ علمي شورا غونډه ترسره سوه. په دې غونډه کي چي د یاد پوهنتون رهبري، استادانو او مسؤلینو ګډون درلود په ځینو اړینو موضوعاتو خبري وسوې. د یاد پوهنتون محترم رئیس شیخ الحدیث حافظ مولوي محمد نسیم "حقاني" صاحب په خپلو خبرو کي په چارو کي په اخلاص او رښتینولي ټینګار وکړ، او زیاته یې کړه: هر مسؤلیت چي راسپارل کېږي باید په پوره ژمنتیا او پاک نیت سره یې ترسره کړو. نوموړي وویل چي د وزارت مقام سره به په همږغۍ د استادانو او زده کړیالانو د شته ستونزو د حل موندلو په برخه کي کار کوي. ورپسې د یاد پوهنتون مالي او اداري چارو مرستیال ډاکټر سمیع الله "سعید" صاحب د یاد پوهنتون د پروژو اړوند معلومات وړاندي کړل د نویو او تر کار لاندي پروژو لکه: د ودانیو د ترمیم، انجنیري او کرنیز ماشینري، لابراتوار او سولري برېښنا پروژو د تکمیل او اړوند مواردو په اړه یې اړین معلومات وړاندي کړل. د یاد پوهنتون علمي مرستیال پوهنیار محمد نعیم "دوست" صاحب د درسي بهیر په پیل مهي سپارښتني وکړې. همدا ډول یې د زده کړیالانو د تیوریکي زده کړي ترڅنګ په عملي ډول د تجربو سرته رسول، له تخنیکي آلاتو او لابراتوار سره زده کړیالانو بلدولو او اشنا کولو هم ټینګار وکړ. همدا راز د په یاده غونډه کي د پوهنځیو رئیسانو، استادانو او مسؤلینو لخوا یو شمېر اړین تصمیمونه ونیول سول. هلمند پوهنتون نشراتو کمېټه
