هلمند کي کانکور ازموینه د هلمند پوهنتون په همکارۍ د ازمویني ملي اداري له لوري پیل سول
نېټه: ۱۴۴۵/۱۲/۲۸ ه.ق
نن پنجشنبه هلمند کي شاوخوا د ۱۸۰۰ تنو زده کوونکو د کانکور ازمویني د ورکړي بهیر د دوو ورځو لپاره د ازمویني ملي اداري د استازو او هلمند پوهنتون د استادانو په همکارۍ را پیل سو.
د یادي ازمویني د پیل غونډه کي د هلمند پوهنتون رهبرۍ، د ازمویني ملي ادارې مسؤلینو، د هلمند پوهني رئیس، علماؤ، استادانو، کارمندانو او ځوانان ګډون درلود.
د هلمند پوهنتون د محصلانو چاور مرستیال ښاغلي مفتي صدیق الله همت د ازمويني د ګډونوالو په تړاو وويل: په ځوانانو ویاړو، چي زده کړي خوښوي، په دې هیله راغلي، چي لوړو زده کړو ته لار پیدا کړي او د خپل ذوق پوهنځي ته بریالي سي.
د هلمند پوهني رئیس ښاغلي الحاج محمد عوض انصاري صاحب د ډاډمن چاپیریال او په روانه ازموینه کي د اسانتياوو د شتون په اړه خوښي څرګنده کړه او په دې برخه کي یې د اړوند مسؤلینو له هڅو مننه وکړل.
د ازموینو ملي ادارې د پلان او پالیسۍ مسؤل ښاغلي محمد داود ځلاند په یاده اداره کي د وروستیو اسانتیاوو او سهولتونو د شتون په اړه خبري وکړې.
ښاغلي ځلاند زياته کړه، د تیر په پرتله د ازمویني په پروسو کي د ناکامه کېدو ویره له ګډونوالو لیري سوې او نن له ښوونځي څخه فارغ د هر عمر کسان راځي او په ازموینه کي په دې هیله ګډون کوي چي خپل علمي ظرفیت لوړ کړي.
د ازمویني ملي ادارې مسؤل د هلمند پوهنتون د رهبرۍ او کاري ټیم د بشپړي همکارئ څخه خوښي څرګنده او د دوى له هڅو يې مننه کړل.
د یادولو وړ ده، چي د هلمند په ګډون ګڼو نورو ولایتونو کي هم د کانکور ازمویني څو ورځنی بهیر پیل سوي، چي د پايلو تر اعلان وروسته به بریالي زده کوونکي د خپلي خوښي پوهنځي ته لار پیدا کړي.
