.د مالیې وزارت څخه راغلي پلاوي له خوا د افغانستان د مالیاتي نظام په اړه معلوماتي سمینار وړاندي سو
نن ورځ چهارشنبه د هلمند پوهنتون د غونډو تالار کي د مالیې وزارت څخه راغلي پلاوي د افغانستان د مالیاتي نظام په اړه یوه معلوماتي غونډه ترسره کړه. په دې غونډه کي د هلمند پوهنتون رهبرۍ، د شرعیاتو، حقوق او اقتصاد پوهنځیو محصلین، استادان، د هلمند ولایت مستوفي الحاج ملا نعمت الله مغیره او د خصوصي پوهنتونونو استازو ګډون کړی و.
د غونډېي پیل د قرآن کریم د څو مبارکو آیاتونو په تلاوت سره وسو.
وروسته د هلمند پوهنتون رئیس، شیخ الحدیث و التفسیر مفتي محمد شریف الله ابو احمد صاحب، د راغلي پلاوي هرکلی وکړ او په خپلي وینا کي یې وویل: الحمد لله، زموږ د هیواد اقتصادي وضعیت له کړکېچن حالت څخه راوتلی دی او ورځ تر بلي د اقتصادي پرمختګ په لور روان دی.
نوموړي اقتصاد د هر هیواد د ځان بسیایني او ثبات لپاره حیاتي وباله. هغه د اسلامي امارت تر حاکمیت وروسته د هیواد د اقتصادي مرستیال، محترم ملا عبدالغني برادر او د مالیې وزارت هڅو ستاینه وکړه. مفتي صاحب څرګنده کړه چي افغانستان د یوې پاکي بودیجې برخمن دی، چي د هر ډول سود او ریبا څخه پاکه ده.
وروسته د مالیې وزارت اړوند د عوایدو او ګمرکاتو معینیت د عامه اړیکو آمر، محترم روزي محمد نېک مل صاحب، د افغانستان د مالیاتي نظام په اړه معلومات وړاندي کړل. هغه په خپل وینا کي وویل: د اسلامي امارت د واکمنېدو سره، د هیوادوالو څخه د مالیاتو اخیستلو په برخه کي د پام وړ تخفیفونه اعلان سوي، چي د عالیقدر امیرالمؤمنین حفظه الله و رعاه له خوا ١٦ فرمانونه د مالیاتو په کمښت کي صادر سوي دي.
نوموړي زیاته کړه چي د افغانستان ټوله بودیجه داخلي عواید دي او هیڅ ډول خارجي مرسته نه لري. اسلامي امارت د ښه مدیریت په ترڅ کي د هیواد مالي برخه په غوره توګه اداره کړې ده، که څه هم چي هیواد د مالي بندیزونو، وچ کالۍ، راوښتونکو مهاجرینو او د تېري ادارې د پورونو سره مخ دی.
د سمینار په پای کي محترم نېک محمد صاحب د ملي بودیجې د تمویل لپاره د عوایدو د راټولولو طرحه وړاندي کړه، چي درې اصلي برخي لري: ګمرکي محصول، غیر مالیاتي عواید او مالیاتي عواید.
هغه وویل: اسلامي امارت د داخلي بودیجې د زیاتوالي له پاره تر اوسه هیڅ کومه عامه شتمني نه ده پلورلې او نه یې هم د کوم خارجي ملک څخه قرض اخیستی دی. د دې سره سره، د هیواد مالي وضعیت په ښه توګه ساتل سوی دی.
په پای کي د غونډي ګډونوالو د افغانستان د مالیاتي نظام د مدیریت په اړه خپلي پوښتني وړاندي کړې او د دغو معلوماتو د پراختیا لپاره یې د نورو هڅو غوښتنه وکړه.
غونډه په دعائیه وینا سره پایته و رسېدل.
