.د ټولنیزي دیندارۍ په اړه د دعوت او ارشاد آمریت تربیوي سمینار ترسره سو
نن د هلمند پوهنتون په مرکزي مسجد کي د دعوت او ارشاد آمریت له لوري د ټولنيزي مسلماني او دیندارۍ تر عنوان لاندي یو مهم تربیوي سمینار ترسره سو. په دې معنوي سمینار کي د پوهنتون ګڼ شمېر استادانو، اداري کارمندانو او خدماتي کارکوونکو برخه اخیستې وه.
سمینار د دعوت او ارشاد آمر محترم مولوي عبدالقیوم ذاکر صاحب له خوا د رسول الله ﷺ د یو مبارک حدیث په مفهوم پیل سو، ده وویل، هغه څوک چي مسجد ته د زدهکړي او یا د ښووني په نیت داخل سي، الله جل جلاله ورته د یو قبول سوي حج ثوابونه وربخښي.
محترم مولوي صاحب په خپلو خبرو کي د مسجد د آدابو او اسلامي ښیرازۍ اړوند څو مهم ټکي تشریح کړل. هغه وویل چي مسجد ته د داخلېدو پر مهال اودس لرل، د مسجد دعا لوستل، د شور او بېځایه خبرو مخنیوی او د تیلیفون بندول د ادب مهم اصول دي. هغه زیاته کړه چي هر اعلان او یا خبره د مسجد په فضا کي، هغه وخت اجازه لري، چي د ټولني د خیر او عامه هوسايني سبب وي، خو شخصي مفادات او غیرضروري خبري په اسلام کي منع ګرځول سوي دي او په دې اړه یې یو حدیث شریف مفهوم داسي بیان کړ. کله چي تاسو په مسجد کي څوک د خرید او فروش کار ترسره کوونکی ووینئ، نو ورته ووایئ، الله جل جلاله دي په دې معامله کي برکت نه اچوي.
همدارنګه محترم ذاکر صاحب، د صفونو د درناوي، د مسجد د پاک ساتلو، په پاکو جامو د مسجد ته داخلېدو، د ځان د ظاهري طهارت ساتلو او د نورو له اذیت څخه د ځان ژغورلو ارزښت هم روښانه کړ. هغه ټینګار وکړ، چي مسلمان باید جماعت ته پر وخت حاضر سي، د اذان ځواب ووایي او که په کوم کار بوخت هم وي، د جماعت د احترام په خاطر به کار پریږدي.
د دعوت او ارشاد آمر وویل، که څه هم دا مسایل عام دي او هر مسلمان پرې اګاهي لري، خو بیا هم د ټولو ګډ مسؤلیت دی چي تنکي ځوانان، محصلین او ټولنه په دې برخو کي باخبره او اګاه کړو.
د محترم مولوي صاحب په وینا، په مسجد کي ارامه فضا ساتل او د عبادت کوونکو لپاره مناسب چاپېریال برابرول د هر مسلمان ګډ مسوولیت دی او دا چلند د ټولنیزي مسلمانۍ او ريښتني دیندارۍ څرګندونه کوي.
