.د هلمند پوهنتون محصلانو ترمنځ د ادبي، علمي او معلوماتي سمینارونو سیالي ترسره سوه
نن سې شنبه د هلمند پوهنتون د غونډو په تالار کښي د شرعیاتو پوهنځي له لوري، د محصلانو ترمنځ د یو لړ ادبي او معلوماتي سمینارونو د وړاندي کولو سیالي ترسره سوه، چي موخه یې د محصلانو څېړنیز او علمي ظرفیت لوړول، فکري پراخوالی او د علمي سیالۍ کلتور ته وده ورکول وه.
د هلمند پوهنتون د پنځلسو بېلا بېلو څانګو څخه لسګونو محصلانو پر مختلفو ادبي، علمي او اسلامي موضوعاتو سمینارونه ترتیب کړي وه، چي پر مهال یې د پوهنتون استادانو او سلګونو محصلینو حضور درلود.
د دې علمي پروګرام پیلوونکي او د هلمند پوهنتون د اسلامي ثقافت استاد، ښاغلي مفت / ي شیر محمد عاجز صاحب، د پروګرام د پرانیستي پر مهال په خپلو خبرو کي وویل، چي دا ډول علمي او فکري پروګرامونه د محصلانو د استعدادونو د راڅرګندولو، فکري روزني او نوښت ته د زمینې برابرولو لپاره خورا ارزښتناک دي.
نوموړي زیاته کړه، چي دا سيالۍ محصلان دېته چمتو کوي، تر څو د بحث، څېړني او بیان له لاري خپل فکري ظرفیتونه پراخ کړي او په راتلونکي کي د ټولني د مثبت بدلون لپاره مؤثر رول ولوبوي.
ورپسې د سیالۍ ګډونوالو محصلانو خپل علمي او څېړنیز مطالب، چي ډیره برخه یې پر اسلام، علم، فکري جګړې، ټولني او عقایدو باندي راڅرخېدل، وړاندي کړل.
د سیالۍ ارزونه به د دې پوهنتون له استادانو جوړ، ژوري پلاوي ترسره کړي، چي د محصلانو د څېړنیزي محتوا او وړاندي کولو مهارتونو پر بنسټ به غوره ګډونوال وټاکي او ستاینلیکونه به ورکړل سي.
باید وویل سي، چي تر دې وړاندي هم د پوهنتون له خوا ورته پروګرامونه تنظیم سوي، چي په نتیجه کي یې لسګونو محصلانو ته بېلابېلي مادي او معنوي ډالۍ ورکړل سوي دي.
