.د هلمند پوهنتون مالي او اداري مرستیال د لاسته راوړنو کلنی راپور وړاندي کړ

نن پنجشنبه د هلمند پوهنتون د غونډو په تالار کښي د مالي او اداري چارو مرستیال ډاکټر سمیع الله سعید د ۱۴۰۳ مالي کال د لاسته راوړنو راپور وړاندي کړ.

په دې غونډه کي د پوهنتون رهبرۍ، د بېلابيلو دولتي ادارو مسؤلینو، علمآء کرامو، د فقهي مجالسو مسؤلینو، د پوهنځیو رئیسانو، استادانو، کارکوونکو او وکیل ګذرانو ګډون درلود.

ډاکټر سعید د راپور وړاندي کولو په پیل کي و ویل، چي د پوهنتون د نوي رئیس له راتګ وروسته د هغه د سپارښتنو مطابق ګڼ عملي اقدامات ترسره سوي دي او همدغو اقداماتو ته یې لنډه کتنه وکړه.

ورپسې نوموړي د ۱۴۰۳ مالي کال په ترڅ کي د مالي او اداري معاوینت له لوري پلې سوي پروژې، مالي لګښتونه، د بیارغوني او سرسبزۍ هڅي، د کارکوونکو د ارتقاء پروسه، د نشراتي خدماتو پیاوړتیا، د معلوماتي ټکنالوژۍ برخي پراختیا او د محصلانو د لیلیې خدماتو په اړه مفصل معلومات وړاندي کړل.

هغه و ویل: د یادو فعالیتونو تر څنګ، ځیني خنډونه هم مخي ته راغلي، چي د راپور په وروستۍ برخه کي یې یادونه وکړه. نوموړي ټینګار وکړ، چي دغه ستونزو ته یې په راتلونکو پلانونو کي د حل لاري په پام کي نیولي دي.

نوموړي د ۱۴۰۴ مالي کال پلان سوي چارو اړوند هم ګډونوالو ته معلومات وړاندي کړل.

د غونډي په پای کي هغه کارمندان وستایل سوه، چي په تېر کال کي یې ډیري هلي ځلي کړي او په کارونو کي یې، نوښت او پر وخت رسیدګي کړې.