د پلان جوړوني او راپور ليکني روزنيز سمينار ارائيه سو
نېټه: ۱۴۴۶/۴/۲۳ ه ق
نن شنبه د هلمند پوهنتون د غونډو په تالار کښي د هلمند پوهنتون د بشري سرچینو آمریت د پلان او مسلکي پرمختيا مرکز په همکارۍ د هلمند اداري اصلاحاتو رياست استازي له لوري د پلان جوړوني او راپور ليکني روزنيز سمينار د پوهنتون کارمندانو ته وړاندي سو.
د هلمند د اداري اصلاحاتو رياست استازي دين محمد "رحيمي" د هلمند پوهنتون نوي ګمارل سوو کارمندانو ته د پلان جوړوني، تطبيق او د موخو نه بشپړېدلو علل او عوامل او دغه راز راپور ليکنه، سبک ټاکنه او د راپور جوړولو عناصرو په اړه علمي معلومات وړاندي کړه.
دغه راز د سمينار په بهير کښي سوال او ځواب هم ترسره سو او د ګډونوالو پوښتنو ته ځوابونه وويل سول.
بايد و ويل سي، چي هلمند پوهنتون د ګڼو رياستونو سره د ګډو همکاريو دوه اړخيزه هوکړه ليکونه لاس ليک کړي، تر څو په شريکه توګه د مشترکو سرچينو څخه د وړتيا لوړوني او تجریبو شريکولو په برخه کي متقابله همکاري وکړي.
